Woh Zindagi Hi Kya!

Woh parishram hi kya,
Jisme asafalta na ho,
Woh barf hi kya,
Jo pighalta na ho.

Woh aag hi kya,
Jo jalkar bujhta na ho,
Woh dard hi kya,
Jiska marham milta na ho.

Woh sooraj hi kya,
Jo roshan na karta ho,
Woh zindagi hi kya,
Jo rulaati na ho.

Har samay, har pal,
Saamanya nahin hota,
Dukhi hone ke kaaran,
Tu aane waali khushi ko kyon hai rokta?

Kyon tu hai pareshan,
Kyon kho baitha hai hausla,
Yeh waqt hai, guzar jaayega,
Har sthiti ko tu nahin haraa paayega.

Magar har baar muskurakar,
Agar tune kiya zindagi ka saamna,
Toh koi bhi adchan,
Tujhe safal hone se nahin rok sakega.

Woh kaamyaabi hi kya,
Jisme eershya na ho,
Woh raah hi kya,
Jiski disha na ho.

Woh vijay hi kya,
Jisme jung na ho,
Woh indradhanush hi kya,
Jisme saat rang na ho.

Woh jugnu hi kya,
Jo raat mein chamakta na ho,
Woh zindagi hi kya,
Jo har waqt sabak sikhati na ho.

© Kritika Bhatia